Ұлыстың ұлы күні – Наурыз мерекесі қарсаңында, Сайрам аудандық «Жастар Ресурстық орталығының» ұйымдастыруымен Д.Қонаев атындағы аграрлық техникалық колледжінде ұлттық спорт түрлерінен «Ұлттық спорт — елдігіміздің белгісі» атты жарыс өткізілді.
Жарыстың басты мақсаты – қазақ халқының ұлттық спортын жаңғыртып, жас ұрпаққа таныстыру, оларға ұлттық мұраның құндылығын ұғындыру, сондай-ақ, осы ойындар арқылы денсаулықты нығайту мен командада жұмыс істеу дағдыларын дамыту болып табылады. Осы жарыс арқылы студенттеріміз ұлттық спорт түрлеріне деген қызығушылықтарын арттырып, өздерінің жеңіске деген ұмтылысын көрсете білді.
Бәсекеге толы, өткен жарыстың қорытындысы бойынша нағыз мықтылар жеңіс тұғырына көтеріліп, арнайы алғыс хаттармен және бағалы сыйлықтармен марапатталды.
Асық ату ойынында:
Жүлделі үшінші орынды Ақсукент гуманитарлық колледжінің студенті Закбай Руслан иеленсе, екінші орынды Анвар Исмаилов атындағы кәсіптік колледжінің студенті Журабай Бекарыс еншіледі. Бұл сайыстың бас жүлдесін Е.Сарманов атындағы Гуманитарлық агроэкономикалық колледжінің студенті Кунарбаев Айдос жеңіп алды.
Ләңгі тебу ойынында:
Үшінші орынды Анвар Исмаилов атындағы кәсіптік колледжінің студенті Эркинбеков Илғарбек қанжығасына байлады. Ал, екінші орынды Оңтүстік Қазақстан индустриалды инновациялық колледжінің студенті Санаев Жасур иеленсе, басты бірінші орынды Е.Сарманов атындағы Гуманитарлық агроэкономикалық колледжінің студенті Анваров Абдубасир иеленді.
Тоғызқұмалақ ойынында:
Үшінші орынды Оңтүстік Қазақстан индустриалды инновациялық колледжі, екінші орынды Анвар Исмаилов атындағы кәсіптік колледжі, бірінші орынды Д.Қонаев атындағы аграрлық техникалық колледжі жеңіп алды.
Сайыс соңында аудандық Жастар ресурстық орталығының КММ басшысы Ә.Төлегенов жеңімпаздарды марапаттап, оларға алғыс хаттар мен бағалы сыйлықтар табыс етті. Сондай-ақ, белсене қатысқан барлық студенттер алғыс хаттармен марапатталды.
