Кеше Қ.Жандарбеков атындағы аудандық мәдениет үйінде жаңа оқу жылының басталуына арналған Сайрам ауданының дәстүрлі тамыз конференциясы өтті. Іс-шараны аудандық білім бөлімі ұйымдастырды.
Конференцияның басты тақырыбы – «Білім келешегі: адал азамат, кәсіби маман».
Іс-шара №1 Сайрам балалар саз мектебіндегі ұлт аспаптар ансамблінің орындауындағы сазды әуенмен ашылды. Мәдениет үйінің алдында Жұмысшы мамандықтар жылына арналған арнайы көрме ұйымдастырылып, кіреберісте білім саласындағы ғылыми жобалар мен зерттеулер таныстырылды.
Конференцияның мақсаты:
▪️2024–2025 оқу жылының қорытындысын шығару;
▪️2025–2026 оқу жылына арналған стратегиялық міндеттерді айқындау;
▪️«Адал азамат» ұлттық тәрбие бағдарламасын енгізу;
▪️ Кәсіби білім мен тәрбие сапасын арттыру шараларын нақтылау.
Іс-шара Қазақстан Республикасының Мемлекеттік Гимнімен ашылып, өткен оқу жылының қорытындылары мен жаңа оқу жылының міндеттері туралы бейнеролик көрсетілді. Ардагер ұстаздарға құрмет көрсетіліп, гүл шоқтары табысталды.
Конференция жұмысына Сайрам ауданы әкімінің міндетін уақытша атқарушы С.Дүйсебаев, облыстық дарынды балаларды анықтау және қолдау орталығы директорының м.а. К.Нұржанова, аудан прокуроры Б.Байғозиев, аудандық мәслихаттың төрағасы Ш.Халмурадов, «Қоғамдық келісім» мекемесінің Сайрам аудандық филиалының маманы С.Айтов, мекеме-ұйым басшылары, ардагер ұстаздар, ұлттық-мәдени орталықтардың өкілдері, мектеп директорлары, мұғалімдер мен БАҚ өкілдері қатысты.
Сайрам ауданы әкімінің міндетін атқарушы С.Дауылбайұлы, облыстық орталық директорының м.а. К.Нұржанова және аудан прокуроры Б.Байғозиев педагогтерді жаңа оқу жылымен құттықтап, жылы лебіздерін білдірді.
Сержан Дауылбайұлы өз сөзінде:
«Бұл басқосу — тек өткен оқу жылының қорытындысы ғана емес, алдағы міндеттерді айқындайтын, жаңа бастамаларға жол ашатын маңызды алаң. Бұл – ой бөлісіп, білім саласының келешегін бірлесіп саралайтын, ұрпақ болашағы үшін жауапкершілікті бірге көтеретін тағылымды шара», – деп атап өтті.
Конференция барысында білім беру саласындағы өзекті мәселелер мен заманауи тенденциялар талқыланды. Спикерлер қатарында:
«Ustudy» орталығының директоры;
Дінбаев Миржан Қайырбайұлы,
PhD докторы, «TeachersLab» директоры Сәуле Зейнолла – «Заманауи білім беру жүйесінде кәсібилік пен адалдықты ұштастыру – басты міндет»,
Педагогика ғылымдарының кандидаты, доцент, М.Әуезов атындағы ОҚУ «Ақпараттық жүйелер және модельдеу» кафедрасының аға оқытушысы Ізтаев Жалғасбек Дулатұлы – «Білім берудегі жасанды интеллект: жаңа тенденциялар, мүмкіндіктер мен қауіп-қатерлер»,
«Болашақ» жоғары колледжінің физика пәні жетекшісі, «Казроботикс» федерациясының өкілі Сүлейкулова Гүлбану Оралбайқызы – «Жасанды интеллект – болашақтың кілті» тақырыптарында құнды ақпараттарымен бөлісті.
Білім саласына қосқан елеулі еңбектері үшін 26-ға жуық педагог пен сала қызметкерлері республикалық, облыстық және аудандық деңгейдегі марапаттарға ие болды. Сонымен қатар, Жұмысшы мамандықтар жылына орай ҚР Оқу-ағарту министрлігінің Алғыс хатымен екі кіші қызметкер марапатталды.
Сондай-ақ, ҚР Оқу-ағарту министрлігінің «Үздік балабақша – 2025» марапатына және «Тірек мектепке дейінгі ұйымдар» қатарына енген «МК-Аяулым» жекеменшік бөбекжай-балабақшасы да марапатқа ие болды.
Аудан әкімінің Алғыс хаты – 11 педагогке және әлеуметтік педагог, мектеп кітапханашысына;
Облыс әкімінің, облыстық білім басқармасының, облыстық мәслихаттың және министрліктің марапаттары – 15 ұстаз бен мектептің кіші қызметкерлеріне табысталды.
Конференция соңында аудан өнерпаздарының қатысуымен салтанатты концерт өтіп, қатысушылар естелік суретке түсті.
М.ҚУАНЫШҚЫЗЫ.
