Ақбұлақ жайдарман тобының жетістіктері арқылы жастардың мәдени және шығармашылық дамуының маңыздылығын көрсетуге болады. Бұл мақалада топтың 2023-2024 жылдары қол жеткізген нәтижелерін талдай отырып, олардың сахнадағы өнерлерін, команданың қалыптасу тарихын, жетістікке жету жолын және жалпы жайдарманның жастар үшін қандай маңызға ие екенін көрсетеміз.
Ақбұлақ жайдарман тобының құрылуы мен дамуы:
Ақбұлақ жайдарман тобы 2017 жылы Сайрам ауданында, Ақбұлақ ауылындағы Ә.Құрмантаев атындағы жалпы орта мектептің қабырғасында қалыптасқан. Команданың құрылуына сол кездегі Жайдарман ойындарының Сайрам ауданы бойынша жетекшісі Әділхан Төлегенов Себепкер болып, командаға жетекшілік етті. Команда құрамы сол кезеңде жас болғанына қарамастан, олардың ықыласы мен мақсаттары үлкен болды. Облыстық, республикалық сайыстарда жүлделі орындардан көрініп жүрді. Дегенмен, команда мүшелері мекетеп бітірген соң жоғарғы оқу орындарына түсіп кетті. Араға уақыт салып команданың капитаны Асқарбек Маматов пен ойыншысы Ержан Жанзақовтың ынтасымен Ақбұлақ жайдарман тобы 2022 жылы қайта құрылды. Қазір команда құрамында Асқарбек Маматов, Ержан Жанзақов, Досан Әбу және Ерман Бекқұлы өнер көрсетеді.
Жетістіктері мен марапаттары
2022 жылы Ақбұлақ тобы Шымкент қалалық жайдарман ойындарында финалист атанса, араға жыл салып Ақбұлақ жайдарман тобының жаңа құрамы өздерінің алғашқы жетістіктеріне қол жеткізді. Шымкент қалалық жайдарман ойындарында 3-орынды иелену арқылы топ өздерін ең үздік командалардың қатарына қосып, болашаққа үлкен үмітпен қарауға мүмкіндік алды.
Осыдан кейін Ақбұлақ тобы Республикалық Премьер лига ойындарында өнер көрсетіп, үлкен аудитория алдында өз өнерлерін паш етті. Бұл кезеңде команда мүшелері үшін маңызды тәжірибе жинақтап, жоғары деңгейдегі командалармен бәсекелесу мүмкіндігіне ие болды. Бұл оларға өздерінің кемшіліктерін анықтап, шеберліктерін арттыруға ықпал етті.
2024 жылы Ақбұлақ жайдарман тобы Республикалық Жастар лигасының жартылай финалына дейін жетіп, үлкен жетістіктерге қол жеткізді. Жартылай финалға шығу – әрбір жайдарман командасы үшін үлкен мәртебе, бұл олардың еңбегі мен жігерінің нәтижесі екенін көрсетті.
Сонымен қатар, Ақбұлақ тобы Созақ ауданы әкімі кубогінің чемпиондары атанды. Жетісу облысы әкімінің кубогінде 3-орынды иеленіп, Жамбыл ауданы әкімінің кубогінде 2-орынға лайық деп танылды. Бұл жетістіктер арқылы команда өздерінің өңірлік деңгейде де мықты ойыншылар екенін дәлелдеді.
Команда жетістіктерінің артында тұрған құндылықтар
Ақбұлақ жайдарман тобының жетістіктері кездейсоқ емес. Бұл жетістіктердің артында ынтымақты жұмыс, өзара қолдау және үздіксіз еңбек жатыр.
– Жайдарман ойыны тек қана әзіл мен күлкіге толы ойын емес, ол жастардың интеллектуалдық және шығармашылық әлеуетін дамытудың маңызды құралы болып табылады. Әзіл арқылы қоғамның кемшіліктерін көрсету, оны жақсарту жолдарын іздеу – бұл жайдарман ойындарының негізгі бағыты деп білеміз. Біздің де мақсатымыз осы, – дейді команда мүшелері.
Ақбұлақ тобының болашағы
Алдағы уақытта Ақбұлақ жайдарман тобының алдына қойған мақсаттары жоғары. Олар тек өздерінің шеберліктерін арттыруды ғана емес, сонымен бірге Қазақстанның түрлі өңірлерінде өнер көрсетуді, жаңа аудиториялармен кездесуді және тәжірибелерін бөлісуді жоспарлап отыр. Команда мүшелері үшін жайдарман ойыны тек қана ойын емес, ол өмірдің мәні, шығармашылықтың шыңы, және қоғамға пайдалы болудың жолы.
Қорытынды
Ақбұлақ жайдарман тобының 2023-2024 жылдары қол жеткізген жетістіктері олардың қажырлы еңбегі мен ынта-жігерінің нәтижесі. Бұл команда тек өздерінің өнерлерімен ғана емес, сонымен бірге замандастарына үлгі бола алатындығымен де ерекше. Ақбұлақ тобының болашағы жарқын, олардың алдағы уақытта жаңа биіктерді бағындырып, еліміздің мақтанышына айналатынына сеніміміз мол.
Нұрғиса Төремұратов.
